Zéńdzenié z Riszardã Stoltmannã

We wtórk 29 rujana przëjachôł do naju gòsc ze Szczecëna – wasta Riszard Stoltmann. Je òn nôleżnikã Kaszëbskò-Pòmòrsczégò Zrzeszeniô w Szczecënie i razã z jinyma Kaszëbama òrganizëją wiele pòdjimiznów w swòjim òkòlim, m. jin.: Kaszëbsczé Dnie w Szczecënie, òdnowienié stojącégò przed Zómkã Pòmòrsczich Ksążãtów sztaturë ksãca Bògùsława i ksãżny Anë Jagiellonczi. Za swòje dzejanié wasta Riszard dostôł Skrã Òrmùzdową w 2014 rokù.
 

W najim liceùm pòjawił sã dzãka niemù wistôwk pt. „Z kaszubsko-słowiańskich i polskich losów Pomorza Zachodniego”. Ò tim wistôwkù w. Riszard Stoltmann nama òpòwiôdôł, z cekawòscą pòkazëjącë na planszach ò pierszich wzmiankach ò Kaszëbach na zôpadze Kaszëb.